Ao poo Kea 'kpɩ
98
'Dʋ 'a 'sbɛ‑
Ao ble 'dʋ dee ao 'je Tʋ "bo 'da,
Dɛ ‑nʋɛ ɛɛ' dɩ ‑wee'‑ juua' ke,
ɛɛ' "ikmaa' mɩ ‑ɩ 'ʋn ɛɛ nʋ dɩ klae" klae".
2 Tʋ "bo 'a nyʋ 'pʋʋa' poɛ "jri "kpae',
ɛ ‑sa ɛɛ' "isrɛa' 'kwla 'de 'blʋɩ ‑wee'‑ ‑pee.
3 Tʋ "bo poɛ ɛɛ' nyʋ 'a ‑tɩ' kmaa' ke,
ɛɛ' 'diwɔnmɔa' 'a ‑tɩ' ‑kwlʋ o,
'de Israɛ 'a ‑tɩ' 'ʋn, dɛ ‑mua mamaʋ,
‑ɛ ‑jɛɛ a 'blʋa 'a "tiin ɛ,
nyʋ ‑wee'‑ 'jeeɛ, ka ‑aa Kea a 'pʋʋa nyʋ ɛ.
4 Ao ‑saa 'mʋa‑ cnuɛn" 'de Tʋ "bo ‑pee,
ao nyʋ "klein ‑nɩa 'e 'blʋa 'di ɛ,
Ao 'bɛɛ‑ ɛɛ' 'nynɩ 'de blewlu 'di.
5 Ao nʋ ‑si' ‑plʋ,
ao "duo blaadɩ ‑wee'‑ "klein 'ʋn,
ao 'je Tʋ "bo 'a 'nynɩ "i 'bɛɛ‑!
6 Ao bla ‑koin ke, due ke,
ao 'je 'mʋa‑ cnuɛn" ‑saa,
'de Tʋ "bo ‑nɩa 'beɔ "juɛi.
7 'Tɔniɛ ke, dɩ "klein ‑nɩa 'de ɛ wɔn ɛ, ɩ ‑wee'‑ kwlu,
'kmʋ ke, nyʋ "klein ‑tia" 'de ɛ "kpei nʋ 'mʋa‑!
8 "Ni ‑gbii ‑wee'‑ nʋ 'mʋa‑,
crʋ ‑wee'‑ "klein ‑saa 'mʋa‑ cnuɛn".
9 Nyʋ ‑wee'‑ 'bɛɛ‑ Tʋ "bo 'a 'nynɩ "i:
dɛ ‑nʋɛ ɛɛ ji', ‑wɛe ɛ 'je 'blʋa 'a 'pee 'je,
ɛɛ muɛ 'kmʋ 'a 'pee 'jea,
‑wɛe ɛ 'je nyʋ ‑wee'‑ 'a 'pee 'je 'de "isrɛa 'ʋn.